Nun pequeñu pueblu asturianu, la rutina de tolos díes ta a puntu de rompese. La inauguración d’un albergue de pelegrinos abre un futuru de posibilidaes, sueños y tamién incertidumes.
Pa Mina y Ramón, un matrimoniu trabayador y con ganes d’emerxer, ye l’oportunidá perfecta: dexar atrás la dureza del campu y apostar por un negociu que promete traer modernidá, turismu y beneficios. Pero nun toos ven la idea col mesmu entusiasmu…
La llegada de dos moces misterioses, que s’escuenden ente los nuevos huéspedes, desata un torbellín de secretos, engaños y conflictos. Mentires, celos, intenciones ocultes y tensiones familiares van complicando un escenariu que, al entamu, paecía llenu de ilusión. Nel mediu, hasta la alcaldesa y el cura ven la ocasión d’amosar interés nel albergue… siempre que les cartes se xueguen bien.
Camín de Santiagu pon sobre’l tableru un debate bien presente: el contraste ente tradición y modernidá, la vida rural frente al puxu del turismu, y el deséu d’un pueblu por medrar ensin perder la so esencia.
Escrita y dirixida por Carmen Campo Mier, esta comedia con un fondu de crítica social nun dexa indiferente: risa, emoción y reflexión xúntense pa tresmitir una historia tan cercana como universal.
GÉNERO: Comedia
AUTOR: Carmen Campo
DIRECCIÓN: Carmen Campo
ELENCO: Bruno Pérez, Luis Barrera, Carmen Campo, Diana Suárez, Susana Blanco, Sara Palacio, Nieves Álvarez, Jose Antonio Valle, Javier Valle, Álvaro Vázquez y Cristina Busto.
DURACIÓN APROXIMADA: 90 min
ESTRENO: 17/08/2025